هي احد ابرز الوجوه الاعلامية الشابة التي ظهرت خلال السنوات الاخيرة وقدمت نفسها في المجال الرياضي بشكل مميز عبر فضائية قناة الزمالك ، فرضت نفسها في تجربة العمل في الاعلام الرياضي في ثلاث سنوات ، هي المذيعة صاحبة الاطلالة الجذابة نادين تيسير ، حاورها مجلة ارقام في علاقتها بالكرة وانتمائها المحلية والعالمية بجانب متابعتها لنجوم الكرة ..
في البداية بتشجعي كورة من امتى؟
بشجع كورة من فترة قريبة ممكن من ٢٠١٦
من امتي بدا معاكي تشجيع الزمالك ؟
من بعد زمان من طفولتي وانا زملكاوية
اهمية ممارسة الرياضة في حياتك بشكل عام ؟
انا شخص بيحب يكون اكتيف بشكل مستمر، بحب التنس والبادل بحب الجري او المشي لكن مش بفضل اني اروح الجيم
امتي اول مرة روحتي فيها استاد؟
اول مرة كانت في مباراة الزمالك مع سيراميكا كليوباترا وكسبنا المباراة ومافيش مرة روحت فيها ماتش للزمالك غير لما يكسب
توقعاتك لمسيرة الزمالك الموسم الحالى؟
الزمالك دايما بيفاجئنا، كتير من الناس بتقول ان الزمالك بره المنافسة لكنه دايما موجود في الصورة، انا متفائلة بالموسم الحالي وبصدارة الترتيب ولو كملنا بنفس المستوى هانكسب الدوري
بتشجعي مين في أوروبا؟
بحب ريال مدريد جدا
مين هايكسب الدوري الانجليزي ؟
اتوقع ليفربول
عندك تيشرت مين من نجوم العالم ؟
عندي تيشرت ليفربول وباريس سان جيرمان وميلان الايطالي
هل ممكن يكون عندنا محمد صلاح جديد؟
اه طبعا طالما صلاح قدر انه يوصل للهدف اللي وصله في مشوار العالمية ليه لا يكون عندنا مثال تاني بجانب ان عمر مرموش نجح انه يوصل لمرحلة بعيدة في الاحتراف..
لو اتقالك هاتدخلي تجربة التمثيل مين نجم الكرة العالمي اللي ممكن يكون بطل العمل معاكي ( رونالدو – إبراهيموفيتش – نيمار)
اكيد رونالدو بلا نقاش، رونالدو لو بيعدي من قدام اي نادي بشجع النادي ده
انبطاعك عن البرامج اللي قدمتيها في قناة الزمالك ؟ واية رايك في البرامج الرياضية في مصر بشكل عام ؟
الحقيقة كلهم مختلفين عن بعض، في البداية قدمت برنامج مورنينج شو، برنامج لايت جدا وخبري بنفس الوقت بجانب فقرة الضيف، عملت زمالك نيوز وهو نشرة اخبارية في المقام الأول، وعملت هنا الزمالك وهو برنامج بيخدم الأعضاء بشكل كبير..
اية رايك في تواجد العنصر النسائي بشكل مؤثر في الفترة الاخيرة بالتحديد في مجال الاعلام الرياضي ؟
طبعا بعيدا عن القنوات الفئوية كان فيه فترة ماشوفناش فيها حيادية بشكل كبير لكن الموضوع بدا يتحسن ونشوف افكار بشكل أفضل..
شايفة تأثير السوشيال ميديا على المجتمع الرياضي ازاي دلوقتي؟
للأسف بحس ان السوشيال ميديا اضرارها اكتر من منافعها، الحاجة الوحيدة اللي بنستفيد منها اننا عندنا مرحلة انفتاح على العالم بنعرف كل اللي بيحصل حوالينا بشكل مستمر لكن تأثيره على المجتمع الرياضي اكيد مضر جدا، وهناك حالة من التعصب من جانب مقدمي البرامج والصحفيين للتأثير على اللاعبين واتمنى إنهاء حالة الفبركة..
هل نجاح المذيعة بيكون للاجمل ام لااكثر ثقافة ام الاكثر جاذبية ؟
اكيد الثقافة الأهم لأنها بتخليك واقف على أرض صلبة لكنها طبعا مش لوحدها لان مهنة تقديم البرامج محتاجة القبول، لذلك الجمال والجاذبية عامل مهم جدا لنجاح المذيعة..
صح ولا غلط :
——–
نادين شخصية اجتماعية؟
نادين شخصية اجتماعية جدا لاقصي درجة وكل اللي يعرفني متأكد من كلامي..
بتاخدي على الناس بسرعة؟
علي الرغم اني اجتماعية بس باخد شوية وقت عشان احدد شخصية اللي قدامي..
ساحل ولاجونة؟
بحب البحر الأحمر اكتر عشان كدا اكيد الجونة افضل بالنسبالي..
صيف ولا شتاء؟
شتاء اكيد..
كاجول ولا فورمال؟
طول الوقت فورمال عشان شغلي بس انا بحب الكاجول اكتر..
