كشفت الإعلامية منى العمدة، عن رأيها في محاولة البعض تصيد الأخطاء للآخرين، تزامنا لما حدث مع الفنان محمد رمضان بعد ظهوره بالدولارات في طائرته الخاصة خلال عودته من أمريكا.
وقالت العمدة، في لايف عبر حسابها على فيسبوك: “ليه بقينا وحشين أوي مع بعض وبقينا نتصيد الأخطاء لبعض، بتستفيد إيه لما تعمل ده؟، وبقينا نشوف الحاجات السلبية بس.. إيه وجه المكسب لما تتصيد الأخطاء للغير؟”.
وتابعت: “أنا في حالة من الاشمئزاز بعد اللي حصل مع الفنان محمد رمضان وموضوع الدولارات.. أنا مش بدافع ومش بهاجم ولكن بتكلم عن سلوك إنساني ومجتمعي وإعلامي”.
واستكملت: “محمد رمضان بيصدر فنه لدول كتير بره مصر ورفع علم مصر جنب علم أمريكا.. بيغلط كلنا بنغلط، والراجل بقاله سنين بيشتغل ويجتهد وبينجح ومينفعش نعايره إنه كان فقير في يوم من الأيام وإنه محدث نعمة.. الراجل قدر يوصل باسم مصر بفنه لدول كتير جدا بره مصر، ووقف على مسرح بأمريكا وخلى الناس تهتف باسم مصر باللغة العربية، ولما اطلب منه يتبرع لعلاج حالات خطيرة استجاب على الفور ومتأخرش.. ليه أصبحت الحاجة السلبية هي اللي بتطلع تريند؟”.
وأوضحت: “إيه مشكلتكم مع كل واحد بينجح كل يوم وأنا بتكلم عن حالة عامة مش بس محمد رمضان، ليه أي نقد ميكونش بناء مش هدام دون تجريح أي أحد أو عشان انت على منصة إعلامية تغلط في حد وتقول إنه محدث نعمة، وتبقي لابسة طقم ألماظ سعره أعلى من الدولارات دي”.
وتابعت: “إيه مشكلتكم مع محمد رمضان اللي بحسه بيواجه حملات ممنهجة طول الوقت على الرغم إن الفنان العالمي عمر الشريف قال عنه إنه موهوب ونجم وأي عمل بيعمله بنجري نتفرج عليه وأعلى إيرادات في السينما المصرية”.
وأضافت: “رمضان مبينمش وبيشتغل وبيستحق كل اللي فيه ومش محدث نعمة خالص، ويا ريت نتقي الله في حياتنا، ومنحكمش على حد لمجرد إن عندنا مشاكل شخصية معاه”.
علي جانب آخر ، يحتفل الفنان محمد رمضان بعيد ميلاده اليوم الثلاثاء ٢٣ مايو، بعد عدة نجاحات بالسينما والمسرح والتليفزيون.
يذكر أن الإعلامية منى العمدة كانت تقدم برنامج “هنا الجمهورية الجديدة” الذي عرض على شاشة قناة “النهار”.
