طالب الإعلامي أحمد موسى، وزارة الاتصالات والشركات المحمولة الأربعة، بضرورة تقديم اعتذار للمواطنين عن ظاهرة الخطوط الوهمية، وبيع أرقام بأسمائهم دون علمهم.
وقال أحمد موسى، خلال تقديم برنامج «على مسئوليتي»، عبر قناة «صدى البلد»، إن هذه الشركات مطالبة بالاعتذار، الكلام دا لو برا الشركات مطالبة بدفع مليارات تعويض، مش عارف هنا هيقولك هدفع كام دقيقة وكام جيجا، إنما برا هتدفع مليارات، دي خيانة أمانة وجريمة.
وتابع: «الموظف اللي عمل كدا لازم الشركات دي تمشيه لأنه خاين للأمانة، أنت لازم تقول موقفك للرأي العام، من أول وزير الاتصالات، حتى هذه الشركات، وزير الاتصالات مسؤول أنا عارف بقول إيه، أنتوا عارفين لو في مسؤول طلع اعتذر للناس وطيب بخاطرهم وتقولهم على الإجراءات اللي هتتعمل، في ناس اشتكت من 2025 ومحدش رد، هل عملت أي إجراءات ضد الشركات دي؟ مفيش أي إجراء تعمل».
وأكمل: «لازم نوضح للرأي العام ما حدث وما سيتم خلال الفترة المقبلة وآلية الإجراءات التي سيتم اتخاذها، إزاي تبيع خطوط بأسماء مواطنين هما مش بيستخدموها، دا المواطن بيدخل على تطبيق ماي نيترا لو مظهرش ليه أرقام باسمه بيعمل فرح، المفروض أصلاً مش يلاقي أرقام باسمه، لا دي في أرقام ومحافظ إلكترونية وتحويلات شغالة، ليه كدا؟ لأن في حد غير أمين استخدم الاسم وعمل بيه خطوط».
وأردف: «طيب من 96 لحد 2026 مفيش قانون لتنظيم عملية استخدام أسماء المواطنين في بيع الخطوط، وهو برا حد يقدر يعمل كدا أو يستخدم اسمه وبياناته في أرقام أخرى، أيام الإرهاب من 20 سنة كان في حاجات زي كدا، وبيتم استخدام أرقام وهمية بأسماء ناس تانية».
وأشار أحمد موسى إلى أن وزارة الاتصالات معنية بتطمأنة المواطنين، ليه أدخل في وجع الدماغ ويكون في خط مستخدم باسمه وهو مش عارف ويقعد يلف على قضية ليه كل، طيب موظف شركة الاتصالات دا أنت رايح تقول ليه أديني بيانات مين الشخص اللي سجل الرقم باسمي يقولك مينفعش علشان سرية العملاء، دا شيء مهين وعدم أمانة، طيب فين سرية بياناتي اللي أنت مش حافظت عليها.
